Sites Associados Imperdível
Apresentaçom de 'Teoria de Inverno. Os Presentes do Apalpador'
Parte dos lucros irám à escola de ensino infantil Semente
Segunda, 19 Dezembro 2011 08:49
PGL - Amanhá, terça-feira, dia 20 de dezembro, terá lugar a apresentaçom de umha das últimas novidades na loja Imperdível: Teoria de Inverno. Os Presentes do Apalpador. O ato será às 19h30 na Faculdade de História de Santiago de Compostela.
Teoria de Inverno é um trabalho coletivo que conta com a participaçom de Jorge Paços, André Pena, Pepe Árias, Maria Iglesias, José André Lôpez, André Seoane, Mar Llinares, Carlos Calvo, Anjo Rua Nova e Jose Cadaveira.
Do Conselho Geral da Gentalha do Pichel assinalam que este livro nom contou com apoio institucional, pois «nom nasceu nos gabinetes da Faculdade de Antropologia que nom existe, nem nos confortáveis escritórios dos membros do Conselho da Cultura Galega». Também nom foi «encomendado polo Instituto Padre Sarmento nem financiado pola Conselharia da Cultura», como tampouco «foi apoiado polos departamentos de História da USC nem amparado pola área de Cultura da Deputaçom de Lugo». Ainda, «as fundaçons dos novos bancos e das velhas caixas nada sabem dele e o Conselho Galego de Museus têm mais cousas que fazer».
Trata-se, portanto, de um livro que nasceu «nos obradoiros da Galiza. Uns obradoiros situados nos baixos do País onde cada vez somos mais a trabalhar», com umhas «instituiçons culturais autistas (e negligentes) por um lado, e, por outro, umha massa de novas e novos militantes que, mais umha vez, decidem nom esperar por ninguém para porem maos à obra».
Teoria de Inverno é «umha reflexom coletiva que pretende abrir caminho, ser a primeira pedra de um conjunto de estudos mais profundos, mais sistemáticos e mais alargados sobre a nossa identidade, mitologia e tradiçons». Nom se apresenta, pois, como um produto final ou acabado, mas como »a primeira tentativa de estudo multidisciplinar sobre um fenómeno poliédrico –o Apalpador- que é abordado aqui de diferentes perspetivas: a perspetiva etnográfica do mito, a perspetiva social da sua recuperaçom e a perspetiva antropológica do seu papel na nossa sociedade tradicional e atual».
O livro está à venda na loja Imperdível por apenas 12€, e parte dos lucros irám destinados à escola de ensino infantil Semente.
+ Ligaçons relacionadas:
