PGL - A diretiva da Agrupaçom Cultural O Facho, assumindo como próprias as palavras de Juan Ramón Jiménez quando afirmava que “teatro infantil é aquele de que também gostam os nenos”, convoca umha nova ediçom do seu concurso de teatro infantil. Poderá participar qualquer pessoa, sem restriçom, desde que a obra seja inédita e redigida em língua galega. O prémio serám 100 € e uma biblioteca de livros teatrais.

A seguir reproduzimos as bases do concurso, atualizadas para 2014:

1º) Poderá optar ao devandito prémio qualquer pessoa, sem restriçom, desde que a obra seja inédita e redigida em língua galega –em qualquer tipo de suporte– nom representadas, nem premiadas noutros certames.

2º) Estabelece-se como prémio único 100 € e uma biblioteca de livros teatrais.

3º) A obra, que nom poderá exceder os 80 fólios, será apresentada por quintuplicado, em formato DIN A4, a duplo espaço e mecanografados por um só lado.

4º) Os originais para o Concurso serám enviados por correio à sede da Associaçom Cultural O Facho, rua Frederico Tápia n.º 12-1º, Corunha (15005) ou à caixa dos correios n.º 46, Escritório Principal da Corunha. Serám apresentadas sob um lema, que figurará na capa dos textos enviados, e virám acompanhados de um envelope fechado que contenha no exterior o lema da obra e, no interior, o nome, apelidos e telefone do autor ou autora.

5º) O prazo de admissom de originais finda o dia 31 de março de 2014 às doze da noite. A resoluçom do prémio será feita público no mês de maio.

6º) Os ganhadores serám eleitos por um júri nomeado pola Associaçom Cultural O Facho. O mesmo está composto por pessoas de reconhecido prestigio no âmbito teatral galego.

7º) O júri poderá declarar deserto um ou vários dos prémios do concurso e será o que deverá resolver aquelas situaçons que se apresentarem ou nom estiverem recolhidas nestas bases, bem como as dúvidas que podam existir na sua interpretaçom.

8º) A participaçom neste certame implica assumir as bases do mesmo.

9º) Os originais nom premiados poderám ser retirados, no prazo de 30 dias, no local do Facho, prévio correio dirigido ao endereço postal da Agrupaçom. No caso de o autor ou autora nom residir na Corunha, poderá solicitar que lhe sejam enviados por correio postal.

Esta convocatória entrará em vigor ao dia seguinte da sua publicaçom nos meios.