PGL - Em correio remetido para o Portal Galego da Língua, um leitor queixa-se do mau atendimento telefónico que lhe dispensou a empresa Aqualia, que gere o serviço municipal de águas de Vigo, polo facto de se dirigir a eles em galego.

Segundo nos conta, a 7 de setembro sofreu umha avaria que o deixou sem água, polo qual ligou para o número de avarias de Aqualia. Depois de se identificar e de contar muito por cima o que lhe acontecia, a pessoa que o atendeu perguntou «¿me puedes hablar en castellano?».

O nosso leitor, e cliente da empresa, negou-se, pois ligando para um telefone que começa por 986, «supunha que estava a falar com alguém da província de Ponte Vedra» e, além do mais, «o meu idioma é o galego», polo que rejeitou mudar de língua. Devido a isto, obtivo como resposta que um comercial o ligaria de novo.

Contudo, essa suposta chamada, critica, nunca se produziu, polo que ligou para o número de atendimento ao cliente. Voltou ser atendido em castelhano, mas desta vez a pessoa ao outro lado da linha «em nenhum caso me 'solicitou' que mudasse de idioma».

Ainda mais tarde, volveu ligar para o atendimento ao cliente e, já sim, foi atendido em galego desde o começo. Contudo, «o 'comercial' nunca me ligou».

O nosso leitor conclui o escrito ironizando que este triste episódio é um «exemplo do 'perseguidos' que estám os castelhano-falantes na Galiza».

O galego e as empresas fornecedoras de serviços

A lei 1/2010, de 11 de fevereiro, numha diposiçom sobre o fomento do uso do galego em empresas fornecedoras de serviços, afirma o seguinte: «deverám oferecer a possibilidade de manterem a comunicaçom oral e escrita em galego".

Portanto, esta disposiçom afeta a Aqualia, empresa subministradora do serviço de águas de Vigo, mesmo apesar de formar parte do grupo empresarial espanhol FCC (Fomento de Construcciones y Contratas).

Nota da redaçom: Do PGL contactámos Aqualia para conhecer a sua versom e opiniom sobre este episódio, bem como ao Concelho de Vigo. Por enquanto nom recebemos resposta, mas se responderem informaremos a respeito.

+ Ligaçons relacionadas:

• Junta retifica e elaborará plano de normalizaçom com empresas fornecedoras de serviços [PGL, 14/07/2010]
  
• A Junta ignora as obrigas lingüísticas de Unión Fenosa-Gas Natural [PGL, 02/06/2010]
• Pedem para os fornecedores de serviços usarem o galego [PGL, 07/05/2010]
• O BNG denuncia a atitude lingüística da empresa Unión Fenosa-Gas Natural [PGL, 04/12/2009]
• Unión Fenosa: «A mí me habla en español, que yo soy española» [PGL, 01/12/2009]