A exposiçom 'As Cantigas de Santa Maria. Arte BDieval' volta para a Galiza
Está no IES Terra do Xallas de Santa Comba de 21 de março a 11 de abril
Quinta, 27 Março 2014 11:33

Esta amostra tem caráter itinerante e está a disposiçom de qualquer centro educacional
PGL - As Cantigas de Santa Maria. Arte BDieval, exposiçom itinerante de banda desenhada desenvolvida por BDBanda com a colaboraçom da Associaçom Galega da Língua (AGAL), regressa à Galiza após passar polo País Basco. A amostra é umha aproximaçom inédita a estas cantigas que explora a sua vinculaçom com a banda desenhada. O atual destino é IES Terra do Xallas, em Santa Comba, onde estará entre os dias 21 de março e 11 de abril.
Esta amostra, editada no padrom internacional da nossa língua, analisa como nestas cantigas, para lá da importância musical, cabe destacar um «exemplo pioneiro da novena arte». Som dez painéis a toda cor em que se analisa de modo didático alguns dos recursos próprios da banda desenhada que se podem encontrar nesta obra, tais como a composiçom de página, a representaçom do tempo ou a integraçom de texto de desenhos. A exposiçom também achega informação de contexto sobre questões como a história, a língua ou a elaboraçom dos códices medievais.
As Cantigas de Santa Maria. Arte BDieval oferece-se aos centros educativos acompanhada de um guia didático onde se propõem múltiplas atividades a partir das cantigas, animando a compreendê-las como um projeto multimédia que se pode tratar a partir de disciplinas como Literatura, História, Música ou Arte.
O projeto foi apresentado publicamente em novembro de 2012 na seqüência do evento Culturgal, em que a AGAL, BD Banda e O Garaxe Hermético compartilharam um posto e colocaram os panéis da exposiçom para desfrute do público que se achegou ao Palácio da Cultura de Ponte Vedra.
Quer levar a exposiçom ao seu centro?
Como indicado, a exposiçom tem caráter itinerante e está disponível para exibir aos centros educativos interessados, que podem solicitar mais informações no endereço eletrónico logistica[arroba]agal-gz.org.
+ Mais info:
- "As Cantigas de Santa Maria. Arte BDieval" na UPV/EHU de Gasteiz [PGL, 03 de março de 2014]
- "As Cantigas de Santa Maria. Arte BDieval" na Universidade de Deusto [PGL, 13 de fevereiro de 2014]
- 'As Cantigas de Santa Maria. Arte BDieval', percorre já centros educativos da Galiza [PGL, 19 de março de 2013]
- AGAL colabora com BD Banda numha exposiçom de banda desenhada [PGL, 26 de novembro de 2012]