Os Bonés Vermelhos bretons sobem a fasquia das suas reivindicaçons

Babel

Os Bonés Vermelhos bretons sobem a fasquia das suas reivindicaçons

O movimento assume reclamaçons históricas do bretonismo, como a oficialidade da língua, a reunificaçom e a "relocalizaçom das decisons políticas" · Os comités locais proponhem umha Bretanha com capacidade legislativa e com autonomia financeira e educativa · Os Bonés Vermelhos aderem à manifestaçom pela reunificaçom da Bretanha do mês próximo

Quinta, 13 Março 2014 00:00

PGL - O movimento bretonista dos Bonés Vermelhos concretizou onze "reivindicaçons principais" para o futuro da Bretanha, depois de os seus militantes e simpatizantes se reunirem neste sábado em Morlaix para analisar as 15.000 reclamaçons que os comités locais do grupo recolheram desde dezembro passado. Os Bonés Vermelhos pedem ademais que François Hollande, presidente de França, vá "sem demora" à Bretanha para "escuitá-los".

As petiçons ampliam e desenvolvem as quatro linhas principais que Viver, Decidir e Trabalhar na Bretanha (o coletivo que impulsionou o movimento dos Bonés Vermelhos) apresentara no ano passado. As onze reivindicaçons deste fim-de-semana som mais concretas, sobem a fasquia a respeito das anteriores e, de facto, assumem reivindicaçons históricas do bretonismo: agora, os Bonés Vermelhos lançam ideias próprias como "oficializar a língua e a cultura bretáns", "relocalizar as decisons políticas" ou "dotar à Bretanha dos seus próprios meios audiovisuais e digitais". Umhas novidades que, segundo o grupo, deveriam aplicar-se no quadro de umha "Bretanha forte de cinco departamentos". Isto é, umha Bretanha reunificada: agora, o departamento historicamente bretom do Loira Atlántico fai parte da regiom do País do Loira.

O dossier que os Bonés Vermelhos figérom circular sábado passado entre os mais de 3.000 assistentes também desgranava ideias para aplicar estas onze "reivindicaçons principais" propostas polos comités locais. Há algumhas que, na República Francesa, passam da marca: regionalizar os impostos e a educaçom, criar um Parlamento bretom com capacidade legislativa, estabelecer umha banca bretám e multiplicar por trinta o orçamento da Bretanha.

Nova manifestaçom em 19 de abril

Umha das onze demandas, a reunificaçom, será o eixo principal da mobilizaçom que terá lugar no próximo 19 de abril em Nantes. Umha marcha convocada em janeiro pelos grupos Bretanha Reunida e 44=Breizh e à qual os Bonés Vermelhos decidiram aderir. Os manifestantes explicitarám a sua rejeiçom à divisom atual da Bretanha e a qualquer modificaçom do mapa regional francês que venha a fusionar Bretanha, País do Loira e Poitou-Charentes.

Desde que Hollande anunciou que queria reduzir o número de regions oficiais de França para umhas quinze, o movimento bretonista teme que a Bretanha possa ser subsumida numha só regiom do Grande Oeste.