PGL - O Apalpador, a figura tradicional do Natal em diversas zonas da montanha do país, continua a conquistar novos espaços sociais nas festas natalícias. Assim, Rumboia Xoguetes vem de lançar umha série de bonecos que reproduzem a figura desta personagem para adornar e decorar as casas, espaços sociais e comércios.

Na mesma linha, o jornal digital Galicia Confidencial encetou umha nova campanha de promoçom para os seus subscritores com estes bonecos como presente e mulplicam-se também as iniciativas particulares que tomam esta figura solsticial como motivo para a sua elaboraçom artesanal.

O bondoso carvoeiro já se tem deixado ver também nas montras dalgum comércio para felicitar as festas do Natal, como neste de Santiago.

O Apalpador -conhecido sob o nome de Pandigueiro na comarca de Trives- é a figura mítica do Natal na Galiza. Segundo a tradiçom, fabrica durante o ano carbom e brinquedos com a madeira das árvores das altas montañas e bosques em que mora. Na noite do 24 ou do 31 de dezembro, desce às vilas, aldeias e cidades a visitar as crianças, toca-lhes o ventre para comprovar que comeram bem durante todo o ano e deixa-lhes umha presada de castanhas cozinhadas e, por vezes, presentes de madeira, desejando-lhes um bom ano novo cheio de felicidade e comida.