PGL – Mais um ano, a Gentalha do Pichel está a trabalhar na recuperaçom da figura do Apalpador. Com este motivo, a associaçom compostelana vai realizar amanhá, dia 18, um obradoiro de brinquedos. Hoje terá lugar no local da associaçom a palestra O renascer do Apalpador, ministrada por José André Lôpez Gonçález.

Conta a lenda que este carvoeiro que mora nas montanhas do Courel baixa às devesas a noite do 24 de dezembro e, logo de apalpar-lhes a barriga às crianças para ver se estám bem mantidas, deixa-lhes umha presa de castanhas. É sabido que este velho gigante costuma deixar também pequenos brinquedos para que nenas e nenos joguem todo o ano, mas longe o consumismo destas datas, prefere os presentes feitos a mao ou aqueles fabricados apartir de materiais que já nom usamos.

Por isso, a Gentalha organiza esta sexta feira 18 de dezembro um obradoiro de brinquedos feitos apartir de materiais de refugalho, dirigido por umha educadora ambiental da associaçom ecologista Adega. Nele, darám-nos algumha ideias para realizar nós mesmas pequenos brinquedos feitos com materiais que habitualmente deitamos no lixo e que podem ser aproveitados. Trata-se dumha actividade para todas as idades.

O renascer do Apalpador

Ademais, a associaçom cultural a Gentalha do Pichel programou para hoje, quinta-feira dia 17, às 20h30 horas, umha palestra-debate ao redor da figura do Apalpador e na qual participará José André Lôpez Gonçález, autor do primeiro estudo ^[PDF] publicado sobre esta figura do folclore popular galego. A sua intervençom no Pichel significará a primeira vez que ele fale sobre esta questom em público no nosso país, e fará-o com umha palestra intitulada O renascer do Apalpador.

Polémica

A polémica entorno à figura do gigante carvoeiro chegou neste ano da mao da Câmara da Corunha, que se somou às iniciativas de recuperaçom do Apalpador mas cumha nova imagem inspirada num desenho de Xoán G. Otero. Diferentes colectivos da Galiza, através de umha iniciativa da Gentalha do Pichel, pedírom unificar a imagem do Apalpador para melhorar o resgate, difusom e popularizaçom desta figura, tendo em conta a representaçom iconográfica do artista Leandro Lamas, autor da única imagem reconhecível dos últimos três anos.

+ Ligaçons relacionadas:

• Especial 'O Apalpador' no Portal Galego da Língua
• José André Lôpez Gonçález. O Apalpador. Personagem mítico do Natal galego a resgate. Texto [em PDF] publicado polo PGL em 31 de dezembro de 2006
• O Concelho de Santiago promove alargadamente a figura do Apalpador neste Natal [PGL, 05/12/2009]
• O Apalpador chega também à publicidade [PGL, 04/12/2009]
• Grande trabalho dos centros sociais para recuperarem o Apalpador [PGL, 20/12/2008]
• O Apalpador tornará-se realidade no Natal galego [PGL, 08/11/2008]
• A Gentalha do Pichel recupera o Apalpador, figura mítica do Natal Galego [Velho PGL, 27/12/2007]
• Polo Natal... Chega o Apalpador. Cartaz explicativo em PDF. Gentalha do Pichel, novembro de 2008
• José André Lôpez Gonçález. O Apalpador. Personagem mítico do Natal galego a resgate. Texto [em PDF] publicado polo PGL em 31 de dezembro de 2006
• Grupo do Facebook O Apalpador quer ser o teu amigo
• Material didáctico editado pola AC Foucelhas para enviar às escolas [em PDF]