PGL - O nº 102 do periódico Novas da Galiza leva à capa as próximas eleiçons municipais de 22 de maio. A publicaçom soberanista enfatiza o facto de diversos projetos independentistas apostarem no ámbito local. Também denuncia o «vale todo» do PP «perante a sua dificuldade para governar cidades».

Inevitavelmente, o processo eleitoral vem marcado em boa medida, pois, pola estratégia do Partido Popular, «açulado por uns inquéritos que o deixam fora do governo das grandes cidades». O esforço por assegurar a vitória nos seus feudos «concretiza-se na inclusom de tránsfugas aos quais nom apoiaram anteriormente». Ademais, em concelhos ourensanos «registárom-se denúncias contra representantes do PP por coaçons e por manipulaçons nos censos eleitorais», informa o periódico soberanista.

Sobre as propostas independentistas, do NGZ indicam que se articulárom onze candidaturas, em boa parte graças aos pactos entre diferentes formaçons e sensibilidades. Ainda informam de que o BNG logrou o objetivo de apresentar candidaturas em todos os concelhos da Comunidade Autónoma da Galiza.

A informaçom sobre os comícios autárquicos completa-se com entrevistas a Secundino Garcia Casal, regedor municipal de Sam Sadurdinho e candidato do BNG; Yolanda Díaz, coordenadora de Esquerda Unida na Galiza e candidata por Ferrol; Diego Vila Vázquez, candidato de Mugardos na Esquerda; Paz Romai, candidata da Alternativa Vicinal Ames na Esquerda; Berto Covelo, candidato da FPG em Redondela e Abraám Alonso, de Ponte Areias de Esquerda.

A crise económica e as novas formas de organizar os protestos cidadaos, os subsídios encobertos da Junta aos meios afins, a perseguiçom ao independentismo ou o drama social pola situaçom de quebra de algumhas empresas som também conteúdos analisados este mês.

O número completa-se com artigos de Patrícia A. Janeiro, Carlos F. Velasco Souto, Beatriz Santos, Sino Seco e Séchu Sende, e entrevistas ao economista Xoán Ramón Doldán, Zenón Cervantes e Carlos Aduviri (sindicalistas bolivianos), Xosé María Varela (Associaçom Cultural Monte Branco de Couso, Pontecesso), Vítor Batalháns (Ateneu Proletário Galego) e David Rodríguez (coletivo A Nave das Ideas). Na secçom Palestra, Mauro Silva e Isaac Lourido debatem sobre o Dia das Letras e a figura homenageada, Lois Pereiro.

Ainda, do Novas contactárom Valentim R. Fagim para explicar o projeto aPorto, e juntárom os músicos Miguel Mosqueira (Ataque Escampe), Martin Wu (The Homens) e Davide Seném Outeiro (ex Xenreira e atualmente em Filmika Galaika) para falarem das dificuldades na cena musical galega, em concorrência com a indústria espanhola.

A Revista

Por sua parte, no suplemento A Revista há publicados vários artigos de interesse. Um deles, intitulado «Os outros independentistas galegos», que explica das origens galaicas de destacados luitadores pola independência dos países americanos. Um outro, «Nós na revoluçom galega de 1846), achega várias perspetivas acerca da revolta conhecida como dos Mártires de Carral.

Sole Rei colabora na secçom A Foto, Pedro Casteleiro na de criaçom, Francesco Traficante em Cinema para Pensar (nesta ocasiom, sobre o filme Umha mulher em Berlim), e Valentim R. Fagim escreve um novo texto para a secçom Língua Nacional, nesta ocasiom dedicado a um vídeo que virou popular nos últimos dias.

+ Ligaçons relacionadas:

• Canal 'Novas da Galiza' do PGL
• Números anteriores e mais informaçom
  
• Fazer-se assinante do Novas da Galiza