PGL - Como cada ano, para lá da manifestaçom do dia 17 de Maio, há multidom de atos por todo o país e parte do estrangeiro para comemorar o Dia das Letras. A seguir vamos difundir alguns dos que fôrom comunicados à redaçom do Portal.

A dia 16, a Agrupaçom Cultural "O Facho" realizará umha oferta floral nos jardins de Mendes Nunes, na Corunha, diante do monumento dedicado a Curros Henriques. Será às 12h30. No ato intervirá o presidente do Facho, José Luís Rodrigues Pardo.

A 18 de maio, a casa da Galiza de Guipúscoa (r/ Zabaleta 28, no bairro de Gros), no País Basco organiza umha conferência de Xosé Estévez sobre a relaçom de amizade entre o relator e o poeta Manuel Maria. A seguir, comunicará-se a resoluçom do júri do I Certame de Poesia em Língua Galega "Manuel Maria". Da organizaçom destacam a «ampla participaçom» no certame, cujo júri integrárom Xosé Estévez (doutor em história pola Universidade de Deusto), Paulo Lema (professor de Língua e Literatura Galega na Universidade de Deusto) e Rocio Dourado (professora de Língua e Literatura Galega na Universidade do País Basco).

Também a 18 de maio, às 22h30hs, música em galego na Fundaçom Artábria (travessa de Batalhons 7, Ferrol), com atuaçom dos Além de Ancos. A entrada é de graça.

X Festa da Língua

Em Ponte Vedra, os centros sociais Revira e En Pé organizam a décima ediçom da Festa da Língua. Terá lugar a dia 18 e iniciará às 14h30 com um jantar popular no C. S. En Pé. Às 19h haverá livros viageiros e recital poético na praça da Verdura, e às 20h umha regueifa no mesmo local. Às 21h, chouriçada no En Pé.

Semana das Letras no Pichel

Da Gentalha do Pichel organizam toda umha Semana das Letras. Iniciou a 15 de maio com um roteiro urbano focado nos pássaros e posterior projeçom do Cineclube de Compostela. Para hoje, dia 16, às 20h, está prevista a encenaçom de Saxo Tenor, de Teatro do Faísca com texto de Vidal Bolanho. Para a sexta-feira, a habitual Festa do Dezassete, que nesta ocasiom sim se celebra no dia 17. O programa da festa iniciará às 10h30 com umha bicicletada pola língua, para as 12h convidam a participar na manifestaçom nacional em defesa do galego, para as 15h um jantar popular na praça 8 de Março, ateliê de fabrico de brinquedos e jogos criativos às 17h, foliada na praça do Pam às 18h e ceia-petiscos mais concertos a partir das 21h no centro social (r/ Santa Clara 21, Compostela).