PGL - A terceira ediçom do concurso Ângelo Casal, convocado pola Galicola, chega ao seu fim. As consumidoras que o desejarem tenhem até quinta-feira 17 de maio, dia das Letras Galegas, para dar o seu voto por meio das etiquetas do refresco, votando por um ou vários dos projetos apresentados nesta terceira ediçom do certame.

Este ano participárom as seguintes entidades e projetos:

• Associaçom Galega da Língua (AGAL): há dous anos promoveu o Musicando Carvalho Calero. Agora, a entidade reintegracionista pretende realizar umha versom lusófona do concurso.
• Galiza Contrainfo: Coletivo de contra-informaçom audiovisual que se apresenta com a intençom de destinar a dotaçom económica para a manutençom do portal web, viagens, novo material, ou fazer fronte às multas que sofre a partir da repressom económica do Estado Espanhol.
• CS Mádia Leva!: O centro social quer destinar o dinheiro do concurso para a mudança de local que realizárom no no mês de fevereiro de 2012.
• Dioivo: Este novo meio galego de informaçom apresenta a sua candidatura para o projeto de criaçom de umha página web realizada por jornalistas desempregados/as.
• Gentalha do Pichel: O centro social compostelano apresenta-se com o seu projeto da escola infantil Semente, com o que pretende construir junto com outros projetos semelhantes as bases para a criaçom da Escola Nacional Galega.
• CS Arredista: Este outro centro social da capital galega apresenta-se com o seu projeto de lecionar um curso gratuito de língua galega para a populaçom imigrante.
• Galizalivre.org: Website decano da contra-informaçom em galego, apresenta-se com o projeto de construir umha hemeroteca digital com vozeiros e meios de comunicaçom de toda a história do arredismo galego.
• Agrupación Cultural Avantar : A associaçom do Carvalhinho apresenta-se com o projeto do Festival Orcellón Fala e Canta, um festival que nasce em março de 2006, com a ideia de “levar a cultura para a gente, ali onde se congrega diariamente, os lugares onde a cultura nom chegava. Assim foi como os bares, pubs ou cafetarias viram-se imersos numha transformaçom atípica, e assim surgiu outra maneira de fazer cultura”.
• A Revoltaina Cultural da Beira de Bergantinhos: Esta associaçom tem como projeto a ediçom de um livro que compila cantares de cego da comarca de Bergantinhos e Ordes.
• O Son do Chafarís: Apresenta-se com a intençom de continuar com o premiado programa cultural galego da Rádio Ordes, realizado de maneira voluntária e comprometida, para difundir a nossa cultura e língua nas ondas.

E qual é o prémio?

A Galicola reserva 5% dos seus ganhos anuais para o fundo Ângelo Casal, onde se junta o dinheiro para os projetos ganhadores. Na primeira ediçom de 2010 apresentárom-se cinco projetos, e o prémio de 365 euros foi para a Mocidade pola Língua. No ano seguinte, apresentárom-se oito projetos, e os 644 euros do prémio fôrom partilhados entre a ganhadora CS A Revira de Ponte Vedra, e a segunda, A Revolta do Berbés de Vigo. No terceiro ano continua a linha ascendente, apresentando-se dez  projetos, e estando já garantido que a quantia do prémio será ainda maior do que a do ano anterior.

Como votar?

É simples! Junta as tuas etiquetas e aponta (pola cara de branco) por qual dos projetos votas. Podes votar por vários deles ou só por um. Mete-as num envelope envia-as para o endereço:

Associaçom Cultural Fontaira
Rua das Teixugueiras, 7 portal 2, 2º D
36212 Vigo (GALIZA)