PGL - Coincidindo com o 100º aniversário do nascimento de Ricardo Carvalho Calero, várias entidades (AGAL, AGLP, BNG e Fundaçom Meendinho) organizam umha semana dedicada ao professor. Palestras e o descobrimento de umha placa a dia 28, no 29 a resoluçom do concurso Musicando Carvalho Calero e a colocaçom de umha estátua a dia 30.

O primeiro dos eventos é a 28 de outubro, às 19h30, no salom de atos da Biblioteca Ánxel Casal (r/Joám XXIII, Compostela). A convite da AGLP, reunirám-se três especialistas para tratar a figura deste ilustre galeguista num ato apresentado pola poeta Concha Rousia.

• 1ª Palestra: "Evocação da pessoa de Carvalho Calero por um discípulo". Relator: José Luís Rodríguez, catedrático de Filologia Galega e Portuguesa da USC
• 2ª Palestra: "Uma visão da língua de Ricardo Carvalho Calero". Relator: António Gil Hernández, Secretário da Comissão de Lexicologia e Lexicografia da AGLP
• 3ª Palestra: " A codificação no modelo ortográfico, morfológico e lexicográfico em Scórpio de Ricardo Carvalho Calero". Relator: Xavier Vásquez Freire, poeta e adaptador de Scórpio para o Acordo Ortográfico.

No mesmo dia, o BNG, com motivo do centenário do nascimento de Carvalho Calero, organiza um ato público para colocar umha placa comemorativa no número 7 do Carril dos Loureiros de Lugo, às 19 horas.

Concurso

Como já foi informado, ao concurso Musicando Carvalho Calero concorrêrom 17 grupos, que deste modo realizárom umha homenagem musical a quem foi designado Filho Ilustre da Galiza polo Parlamento nacional. Destarte, o júri do concurso emitirá seu veredito a dia 29 pola manhã.

O prémio será umha semana num estúdio profissional de música para gravar os temas que considere oportuno e três dias mais para as misturas e masterizaçom do disco. O disco incluirá o tema enviado ao concurso, e será editado com licença Creative Commons.

Estátua

Já na data exata do centenário, dia 30, às 11 horas, será colocada umha estátua dedicada ao professor ferrolano na Alameda de Santiago de Compostela.

Segundo a Fundaçom Meendinho, promotora da iniciativa, o ato será apresentado por Margarida Martins e intervirám Juan Casares Long (reitor da USC), José Martinho Montero Santalha (presidente da AGLP), José Paz (presidente da Associação Pedagógica Galego-Portuguesa), Valentim Rodrigues Fagim (presidente da AGAL), Suso Seixo (secretário-geral da CIG), representantes do Concelho compostelano, familiares de Carvalho Calero e Alexandre Banhos (Fundaçom Meendinho).

No momento de redigirmos estas linhas está pendente de confirmaçom a presença dos reitores das universades da Corunha e Vigo, José Maria Barja e Salustiano Mato.