Musicando Carvalho Calero: 'Nom sei se Matei', de Ruxe Ruxe
O afiançado conjunto Ruxe Ruxe, nacido em Arins em 1996, apresenta a sua proposta para o concurso: Nom sei se matei
Domingo, 17 Outubro 2010 02:30
PGL - Na seqüência do certame Musicando Carvalho Calero, hoje compartilhamos com a audiência do Portal a peça Nom sei se Matei, dos Ruxe Ruxe, grupo formado em 1996 na paróquia de Arins, em Santiago de Compostela.
A composiçom escolhida é a mesma que apresentou Alféizar a meados do mês de Setembro. Esta composiçom está baseada no poema homónimo que Ricardo Carvalho Calero publicou em Futuro Condicional, e que começa com os versos «Nom sei / se matei. / Estivem / na trincheira. / Nom vim / o meu / inimigo. / Disparei. / Nom sei / se matei».
A música de Ruxe Ruxe é umha mistura de rock&roll e música tradicional galega, combinada com umha atitude descaradamente punk. Umha chamativa proposta de instrumentos elétricos e elementos rockeiros com outros muito mais puramente galegos e tradicionais como a gaita para entrar em cheio no chamado folk-rock. As suas letras som integramente em galego e falam do quotidiano e da realidade que rodeia a banda, sempre a partir do prisma do realismo mágico, e misturando o conteúdo social com a festa e a poesia.
Nom sei se Matei - Ruxe Ruxe
O concurso
Musicando Carvalho Calero é umha homenagem musical ao insigne ferrolano organizada em parceria pola Associaçom Galega da Língua (AGAL), em parceria com Komunikando. Grupos musicais ou solistas escolhem um poema do ilustre galeguista para o musicar ou bem escolhem áudios do professor para realizarem samplers. Da AGAL e Komunikando defendem esta iniciativa polo silenciamento da figura de Carvalho Calero neste 2010, ano do seu centenário. Por tal motivo visam «sonorizá-lo».
Os grupos interessados em participar têm ao seu dispor as bases e outras informações no site http://musicandocarvalhocalero.komunikando.net/. O prazo para enviar as propostas finaliza em 20 de outubro, e dez dias depois conhecerá-se o nome do ganhador ou ganhadores.
Votaçom
Os grupos ou solistas ganhadores serám eleitos baixo um sistema misto de votaçom popular via Internet mais um tribunal integrado por pessoas vinculadas de umha ou outra maneira ao difícil mundo da música. Os nomes dos ganhadores e ganhadoras serám conhecidos no dia 30 de outubro, centésimo aniversário do nascimento de Carvalho Calero.
Prémio
O prémio para o grupo ou solista ganhador será umha semana num estúdio profissional de música para gravar os temas que considere oportuno e três dias mais para as misturas e masterizaçom do disco. O disco incluirá o tema enviado ao concurso, e será editado com licença Creative Commons.
+ Ligaçons relacionadas:
