PGL - A Associaçom Galega da Língua (AGAL) colabora com BD Banda numha exposiçom de banda desenhada que se poderá ver no fim-de-semana em Ponte Vedra na seqüência do Cultur.gal, feira das indústrias culturais. Trata-se de umha aproximaçom inédita às Cantigas de Santa Maria que explora a vinculaçom destas com a banda desenhada.

Os detalhes da farám-se públicos esta tarde, às 18h30, na escola profissional O Garaxe Hermético, sediada no baixo da Rúa Álvaro Cunqueiro n.º 4, em Ponte Vedra. Na apresentaçom pública estarám o vice-presidente da AGAL, Miguel R. Penas, o vice-presidente de BD Banda, Germám Ermida, e o diretor do Garaxe, Kiko da Silva.

A colaboraçom da AGAL será com umha das iniciativas, As Cantigas de Santa Maria. Arte BDieval. Esta amostra, editada em português, analisa como nestas cantigas, para lá da importáncia musical, cabe destacar um «exemplo pioneiro da novena arte». Som dez painéis a toda cor em que se analizam de modo didático alguns dos recursos próprios da banda desenhada que se podem encontrar nesta obra, tais como a composiçom de página, a representaçom do tempo ou a integraçom de texto de desenhos. A exposiçom também achega informaçom de contexto sobre questons como a história, a língua ou a elaboraçom dos códices medievais.

Esta amostra será oferecida aos centros educativos acompanhada de um guia didático em qeu se proponhem múltiplas atividades a partir das cantigas, animando a compreendê-las como um projeto multimédia que se pode tratar a partir de disciplinas como Literatura, História, Música ou Arte.

Presença no Cultur.gal

A amostra sobre as Cantigas poderá-se ver na íntegra no Cultur.gal, evento que decorre em Ponte Vedra de 30 de novembro a 2 de dezembro.