Opiniom
I + P
Quinta, 20 Novembro 2008 00:00
Por Valentim R. Fagim
Entre os movimentos sociais que nascem na margem social, mas com aspiraçons de transitar para o centro, é comum que V (Voluntarismo) e S (Sacrifício) ocupem um lugar importante. Pode-se afirmar, até, que na infáncia de um movimento social galego, a equaçom V + S faz parte inerente do seu ser.
A adolescência começa a se desenhar quando a V + S se soma E (Experiência) que fai com que o pisar seja mais firme e as acçons um bocado mais eficazes.
Já o passo seguinte, rumo à idade adulta, nom é assim tam transitado. Há movimentos que preferem os brinquedos e os filmes de época.
E que se passa connosco, galegas e galegos lusófonos? Devo reconhecer que até há pouco passava pola minha cabeça uma coluna intitulada A Doença Infantil do Reintegracionismo. Hoje, polo contrário, sinto que o nosso corpo está a mudar:
(I)
Nasceu a Academia Galega da Língua Portuguesa, AGLP, que servirá para instituir com firmeza a Galiza no seio da Lusofonia.
(P)
O grupo de investigaçom Gálabra, da USC vem de criar Holística, umha consultoria sobre a Lusofonia, que nasce com 2 pessoas contratadas.
A Agal acaba de aprovar na sua última assembleia a contrataçom de 1 profissional.
Este periódico que nos alberga, e a sua filial Inova, tem já 4 pessoas a receberem estipêndios polo seu trabalho.
Edições da Galiza, editora do Atlas Histórico da Galiza, está perto da sua profissionalizaçom.
I (Instituiçons) + P (Profissionalizaçom), umha equaçom para a maturidade.
(*) Artigo publicado originariamente no número 71 do Novas da Galiza, na secçom Língua Nacional.
